مُداوا فاؤنڈیشن عوامی فلاح و بہبو کی سرگرمیوں کا ایک جدید، منفرد اور انوکھا تصور ہے جہاں، بظاہر ایک این جی او ہونے کے باوجود، ہم کسی بھی صورت میں آپ سے اپنے لئے یا کسی اور کےلئے کوئی مالی امداد نہیں مانگتے۔ بلکہ یہ خدمت ِ خلق پر مبنی ایک ایسا فلاحی ادارہ ہے جو آپ سے صرف اپنے قیمتی وقت اور ذاتی توجہ کی درخواست کرتا ہے جس کے مطابق آپ اپنی ہی ترجیحات اور سہولت کے مطابق زندگی کے کسی شعبے میں دکھی انسانیت کی خدمت کر سکتے ہیں۔ مُداوا فاؤنڈیشن کا بنیادی مقصد مشکلات کا شکار لوگوں کی زندگی میں جہاں تک ہو سکے آسانیاں پیدا کرنا ہے۔ ہم میں سے بہت سے لوگ جہاں صحت، تعلیم، کاروبار، ملازمت یا قانونی معاملات وغیرہ میں کسی پریشانی کا شکار ہیں وہیں بہت سے اچھے اور خداترس لوگ ایسے بھی ہیں جن کو قدرت نے اِن شعبوں میں غیرمعمولی صلاحیت، وسائل اور اختیارات سے نواز رکھا ہے اور وہ مشکلات میں گھرے لوگوں کو مفت مشورہ یا امداد فراہم کرنے کو بھی بخوشی تیار ہیں۔ مُداوا فاؤنڈیشن ایسے ہی مدد کے طلب گار اور تعاون کےلئے تیار لوگوں کو ایک دوسرے سے مِلوانے کا ذریعہ بنتی ہے۔ اگر آپ کا شمار ان خوش نصیبوں میں ہوتا ہے جنہیں زندگی کے کسی شعبے میں وسعت، وسائل اور اختیارات حاصل ہیں اور آپ اس شعبے میں ضرورتمندوں کی مدد اور رہنمائی کر سکتے ہیں تو ہمارا ادارہ اِس کارِ خیر کےلئے آپ کو نہایت شاندار موقع اور ماحول فراہم کرتا ہے۔ ا ٓپ اس کے علاوہ بھی اپنی مصروفیات میں سے تھوڑا سا وقت نکال کر مُداوا فاؤنڈیشن کے اس مشن کےلئے بطور والنٹیئر خدمات سرانجام دے سکتے ہیں۔ تاکہ مدد کے خواہشمندوں اور مدد کے فراہم کنندگان کے درمیان رابطے کو زیادہ مؤثر بنا کر تنظیم کی مختلف رفاہی سرگرمیوں کو بہتر اور مربوط انداز میں چلایا جا سکے ۔ ہمارا عزمِ صمیم ہے کہ آپ کے بیش قیمت وقت اور گرانقدر خدمات کی اہمیت کا پورا پورا احساس و اعتراف کرتے ہوئے تنظیمی کاموں کےلئے آپ کو کم سے کم زحمت دی جائے اور اس سلسلے میں آپ کی سہولت اور آسانی کو سب سے زیادہ پیشِ نظر رکھا جائے۔ مُداوا فاؤنڈیشن میں ہم آپ کو اس امر کی بھی مکمل یقین دہانی کراتے ہیں کہ رجسٹریشن اور اس کے بعد بھی فراہم کردہ آپ کی معلومات مکمل طور پر صیغہ ٔراز میں رکھی جاتی ہیں اور آپ کے بیان کردہ مقصد کے علاوہ ان کو کسی اور مقصد کےلئے ہرگزاستعمال نہیں کیا جاتا۔